Saturday 6 May 2017

පොත් කිව්වට පොත්මත් නෙවෙයි,Mr. Church (2016)

“පොතක් කියවන්න තියෙන්නේ පටන්ගැන්මෙ ඉඳං අවසානෙට…
ඒත් හොඳටම තේරුම්ගන්නෙ අවසානේ ඉඳං පටන්ගැන්මට…”





මේක අපූරු සලරුවක් ගැන, මේක බාපු දවසේ ඉඳන් මං කීප වතාවක් නැවත නැවත බැලුවා දුක හිතුන වෙලාවට, තරහ අවම,කම්මැලි උනාම,කෑම කන වෙලාවට මොකක් උනත් අවසානයේ මගේ හිතට සතුටක් දෙන්න පුළුවන් උන ෆිලුමක්. 
ගෙදරට එක පාරටම කඩා පාත් වෙන කෝකියෙක් සහ පුංචි කෙල්ලෙක්ගේ සහ මවකගේ ජීවිතය වටේ ගෙතුන සත්‍ය කතාවක්. අපිට අපේ ජීවිත ගැන නැවත හිතන්න මතක් කරන, අපි අපේ ජිවිත කොච්චර සංකීර්ණ කරගෙනද කියලා අපිට මතක් කරවන සලරුවක්.  මුල සිටම අබිරහස් ගතියක් හිතට දැනෙන අවසානයේදී මුල මද අග ඔක්කොම එකට ගැලපිලා තේරුම් යන ගතියක් තමා මේකේ තියෙන්නේ. 
අපිට හුරු පුරුදු නළු නිලියන් දෙතුන් දෙනෙකුගේ ඉතාමත් විශිෂ්ට රංගනයන් බලාගන්නත් මේකෙදි පුළුවන්. වැඩි විස්තර ඕන නෑ  පුළුවන් අය බලලම comment එකක් දාන්න.
අවසාන වශයෙන් කිව්වොත් ෆයිට් නෑ, වෙඩි නෑ ලස්සන කතාවක් සහ විශ්ෂ්ට රංගනයක් තමා තියෙන්නේ, මේක IMDb 7.7ක ඉහළ අගයක් ගන්න සමත් වෙලත් තියනවා.

Wednesday 3 May 2017

"නැවියන්ගේ කතා"(කතෘ : විජිතානන්ද යද්දෙහිගේ.)




මේ දවස් වල කියවන්නේ රණ මග ඔස්සේ නන්දිකඩාල් තම ඉවර නෑ. කියවලා ඉවර පොත තමා "නැවියන්ගේ කතා" කතෘ තමා විජිතානන්ද යද්දෙහිගේ.  ලොවෙන් එකෙක් එක දෙකට වෙයි සමත කිව්වට නාවික ඉංජිනේරුවෙක් වන විජිතානන්ද යද්දෙහිගේ අපූරු පොතක් ලියන්නත් සමත් වෙලා තියනවා. මේ පොතත් ඔබගේ පුද්ගලික පොත් එකතුවට එකතු කර ගැනීමට වටිනා පොතක්.
අපිට මගතොට වැඩකරන තැන හමුවෙන වවිවිධාකාර  මිනිස්සු සහ අත්දැකීම් මේ මනුස්සයාට මුහුදේදීත් හම්බ වෙලා!

මේ ඒ පොතේ තියන පලවෙනි කතාවේ අන්තිම ටික,
ජර්මානු දාර්ශනිකයෙක් තමන්ගේ හිතට වධ දෙන ප්‍රශ්න ගැන කල්පනා කරමින් වීදියක් දිගේ ඇවිදින විට ලස්සන මල් පිපුණු කොරටුවක් දුටුවා.මෙයා මේ මල් වලට බොහොම ලං වෙලා ඒවා පරික්ෂා කරන්නට පටන් ගත්තා. මේ අමුත්තාගේ අමුතු හැසිරීම ගැන සැක සංකා පහල කරගත්තු අසල් වැසියෙක් පොලිසියට ටෙලිෆෝන් කළා. විනාඩි කිහිපෙකින් නිලධාරියෙක් අවා.
"ඔහේ කවුද?"
පොලිස් නිලධාරියා දිහා මිනිත්තුවක් විතර උඩ ඉඳන් පහළට බලබලා ඉඳලා දාර්ශනිකයා මෙහෙම උත්තර දුන්නා.
"ඒ ප්‍රශ්නයට උත්තරේ හොයාගන්ඩ ඔබ මට උදව් වෙනවානම්, මම ඔබට සදා ස්තුති වන්ත වෙනවා."

ඇත්තටම අපි කවුද අප්පා?

නැවියන්ගේ කතා.
කතෘ : විජිතානන්ද යද්දෙහිගේ
ප්‍රකාශනය : විජේසූරිය ග්‍රන්ථ කේන්ද්‍රය.
මිල : රු. 280.00


මගේ රේටින්: 🌻🌻🌻🌻🌼🌼🌼(මල් හතෙන් මල් හතරයි)


[[ Nawiyange Katha/Wijithanannda Yaddehige/Wijesooriya ]]

ආයුබෝවන්!

"මිනිසුන් පිළිබඳ අධයනය කරන්නෙක් ඒ සඳහා යොදා ගත යුත්තේ පොත් නොකියවන මිනිසුන්ය.මක් නිසාද යත් පොත් කියවන්නන්ගේ චරිතය හා සිතුම් පැතුම් පොත් විසින් මනාව හැඩ ගස්සා ඇති බැවිනි"මෙය මාගේ අදහසක් නොවේ.කවුරු විසින් කියන ලද්දක්ද මා හට මතකයක් නැත.පාසැල් කාලයේ පොත් ගුල්ලෙකු වු මාගේ චරිතය ගොඩ නැගුනේ පොත් ඇසුරින්ම පමණක් නොවූ නමුත් පොත් මා වෙත කල බලපෑම සූලුපටු නැත. පොත් කියවීමෙහි රුසියෙකු වූ මාගේ පියාගේ ආභාෂය  මෙන්ම කුඩා කල අතට හසු වූ හැම දෙයක්ම කියවීමෙන් ලද සතුටත් මා තාමත් කියවීමට ඇඳ බැඳ තබා ගැනීමට හේතු විය.අවුරුදු දෙකකට පෙර මෙය ලිවීමට පටන් ගත් නමුත් කාර්‍ය බහුලත්වය නිසාම වැඩේ කල් ඇදිනි. ඔන්න අද ඉඳන් මං කියවන පොත් වල හොඳ රස තැන් උපුටා දක්වන අතර පොත ගැන මට හිතෙන ඒවත් ටික ටික  කොටනවා.  

ප.ලි : මේ ඔක්කොම කොටලා අන්තිමටම මට හිතුනේ මේවා කියවන එවුන් තම ඉන්නවද කියලා!